8 Ka Vispop Finalists Nga Dili The Usual Hugot Songs

Sa lima ka tuig sa Vispop, 30 ka bag-ong awit (6 ka finalist matag season) nga Binisaya ang nahatagan og higayon nga madunggan sa kadaghanan. Giila nga usa sa labing iladong contest sa pagsuwat og kantang Binisaya dinhi sa Sugbo nga way kahadlok mohatag og bag-ong templada sa naandang tingog sa mga Bisdak nga awit nga atong nadunggan.

Ug kini ang pangutana: tanan bang na-finalist sa Vispop bahin sa gugma ug the usual hugot nga nasikat sa mga batan-on sa Sugbo?

 

1. Historias
(Season 1.0, Alphecca Perpetua)

Hangtod karon walay samag kalibre sa ubang mga Bisdak nga awit kining kantaha. Dili kini bahin sa gugma apan sa pagbaton og paglaom. Musicality-wise, payter kaayo kining templa. Kon maglakaw ka, unya dili ka ganahan anang the usual hugot song, pwede ni nimong i-play sa imong Spotify. Sigurado kong malingaw ka ani.

 

2. Laylay
(Season 1.0, Chai Fonacier)

Sa lima ka tuig sa Vispop, kini ang labing sakit. Nakasuway na ka nga namatyan og minahal sa kinabuhi? Niining kantaha, inspirasyon sa tagsulat niini nga si Lourdes Maglinte ang kamatayon sa iyang lola. Ug kon makadungog ka niini, tingali motulo sad ang imong luha ilabi na kon may samang kasinatian ka sa kinabuhi.

 

3. Habak
(Season 2.0, Bien Lobetos)

Ang atong pagtuo sa mga dili ingon nato, sa habak, ug sa gahom batok sa nagkalain-laing maligno gipadayag niining kantaha. Bisrock nga templada ug may unod sa tatak Bisaya. Way duda, matag rakistang Bisaya manglimbawot ang balhibo kon madungog niining kantaha. Papaminawa imong Lolo o dili ba imong Papa ug sigurado kong ganahan siyang paminawon kinig balik.

 

4. Kasikas
(Season 2.0, Mike Fegi)

Sa daghan unos nga nasinati natong mga Bisaya, ang nahitabong baha tungod sa bagyong Yolanda nahimong inspirasyon niining bug-at sa dughan nga kanta. Ug sa matag higayon nga may katilingbanong katalagman nga mahitabo, takos handomon kining kantaha.

 

5. Tug Ta Tug
(Season 3.0, Earnest Hope Tinambacan)

Atol sa ikatulong tuig sa Vispop, ang kantang Tug Ta Tug usa sa mga kantang makainat sa dunggan. Dili kini bahin sa gugma apan pagpaabot ug sa dili pag-abot bisan dunay nagpaabot. Ug ang reggae beat sa kanta talagsaon ug makalipay nga kini naapil isip finalist sa indigay. Ug tuod, usa kini sa mga kanta nga nindot paminawon kon hapit na magduka. Makapahiyom.

 

6. Brgy. Blues
(Season 3.0, Earl Andrei Ornopeia)

Kataw-anan kining kantaha nga bahin sa usa ka uyoan. Bugal-bugalon kining kantaha, sama sa mga Bisayang kanta nga atong madunggan. Sa akong tan-aw, usa kini ka kanta nga gimugna sa Bisaya alang sa mga Bisaya ilabi na sa mga nagdako ug nagpuyo sa probinsya. Gisalamin gyod niining kantaha unsa ang dagway sa atong mga igsoong Bisaya nga layo sa dakbayan.

 

7. Paghunas
(Season 4.0, Joseph Gara)

Usa tingali sa labing undanon nga kanta sa Vispop ug way duda nganong kini ang midaog sa ikaupat nga tuig sa Vispop. Kon dunay batan-on nga makadungog niini, tingali ang unang masulti mao nga kini usa ka “lawom nga kanta.” Apan kon paminawon lang og tarong, sa akong tan-aw, usa kini ka classic nga kantang Binisaya nga garbo sa atong kaliwat. Unsa gyod kaha ang ikaduhang paghunas nga gisulti sa kanta? Usa ka kini ka balak bahin sa pagtaob unya paghunas sa tubig sa baybayon. Kon ingon pa lang kahugot ang mga hugot, wala gyod untay problema ba.

 

8. Kung Di Pa Lang Ko Buang
(Season 5.0, Chai Fonacier)

Bisag unsaon, lingaw gyod ning kantaha. Lami pagkasuwat ang lyrics, bugnaw sa dunggan ang musika. Ug ang tema bahin sa atong gitawag nga adulting. Unsa gyod diay kalisod ang pagdako? Nganong natandi man sa pagkabuang ang pagbaton og kaakohan sa kaugalingon ug sa katilingban? Tungod kay daghang buang nga naigo aning kantaha ug payter sad kaayo ang version ni Chai nga siya mismo ang nasuwat, way duda nganong kini ang palaran nga midaog.

Ikaw, unsay paborito niining walo ka kanta, bai?

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.