Karong Traffic Kaayo ang Sugbo

Kon wala mo nakabantay nga traffic na kaayo ang Sugbo, bulahan mo.

Kaganiha nagkita mi sa akong mga higala sa Cebu Content Creators ug nakahunahuna nga maghimo og usa ka live video diin among hisgotan ang labihan na intawon ka-traffic sa atong pinalanggang Sugbo.  Ania ang among mubong diskuyon bahin sa traffic dinhi sa atong dakbayan kauban silang CJ, Aldrin ug Wellbein:

Disclaimer: Dili mi expert aning traffic ug unsaon ni paghatag og solusyon apan wala ni nagpasabot nga dili na mi mamahimo nga maghisgot niining problema nga atong gipas-an, mga Bisaya.

 

Unsaon Pagsulbad Kon Traffic Kaayo

Ug kon wala moy oras maminaw niining among kinalit-kalit nga diskusyon, mao kini ang mga punto nga among gihisgotan:

1. Ang tunnel sa Mambaling dakong problema sa mga nagpuyo dinhing lugara.

Giingon ning bag-ohay nga balita ang gihimong tunnel dinha sa Mambaling hangtod pa sa 2020 (kon walay delay nga mahitabo). Kon mahuman na ang gimugnang tunnel, mas hapsay na kuno ang traffic dinhing dapita sa dakbayan. Mao na ang angay natong atngan, mga Bisaya.

Sa pagkakaron, mag-antos lang sa tang tanan sa kasamtangang dagan (o paghunong) sa mga sakyanan atol sa rush hour. Anad na man tang mag-antos di ba?

2. Kon kamao tang tanan motuman sa balaod sa trapiko, mas hapsay ang dalan.

Daghang mga drayber ang nakatag-iya sa dalan. Dili moila og mga pedestrian lane, walay respetar sa sidewalk. Sa akong tan-aw, kon padayon gihapon ang kaubang niining mga nagkalain-laing drayber nga nag-atang lang kon dunay traffic officer nga nagbantay, dili gyod masulbad ang atong problema sa trapiko.

Makalagot lang maghunahuna nga tungod kay nagbantay lang sa mga manakop ang nagkalain-laing tawo, kon walay magbantay, magkabuang gyod matag higayon ang atong mga dalan. Kanus-a pa gyod kaha nato usbon ang atong pamatasan?

3. Aron paspas kang maabot sa imong padulngan: matag sayo o paglakaw na lang.

Traffic kaayo kon rush hour, mao kini ang sagad nga reklamo nga atong madunggan. Kon mao man gyod kini ang problema, ang pagsulbad niini mao ang pagmata og sayo aron dili maabtan og rush hour o paglakaw na lamang kon kinahanglan.

Sa akong bahin, maglakaw lamang ko kon gikan na sa trabahoan paingon sa among balay. Lisod isakay ug hinay ang dagan sa jeepney. Sanglit permanente na man kini nga ingon ani, nakadesisyon ko nga maglakaw na lang aron usab mogamay ning akong tiyan.

Ang problema lamang kon maglakaw mao nga ang atong mga dalan dili buotan sa mga pedestrian. Ang mga drayber dili kamao morespetar sa sidewalk. Ikaw nga naglakaw kasab-an pa sa drayber sa motor nga nangangkon sa imong dalan. Maygani ning ulahing mga adlaw estrikto ang gobyerno sa pagdakop niining mga buang sa dalan.

4. Bisan ang biyahe sa motor dugay na karon tungod kay gidili ang pag-counterflow.

Labihan nakong lipaya dihang nahibaw-an nako nga dakpon na ang mga mo-counterflow nga motor. Sa laing bahin, tungod niini, dili na usab magpatakag overtake ang mga motor. Ang nahitabo karon matanggong na usab ang mga motor sanglit estrikto ang mga mobantay matag eskina. Kinahanglan na gyod og laing solusyon ning traffic kaayo nga Sugbo, mga Bisaya!

5. Kon dili ta kamao modisiplina sa atong kaugalingon, walay gamit ang bisan unsang solusyon.

Sayang kaayo ang nagkalain-laing solusyon nga atong isugyot kon walay maminaw ug motuman niini. Moabot pa kaha ang panahon nga ang traffic kaayo nga Sugbo masulbad? Makapanglingo-lingo na lang tingali ta kon wala gyod tay disiplina, mga Bisaya!

About Rome Nicolas

Magsusulat sa Binisaya. Garbo iyang pagka-Bisaya. Hilig og kaon. Laagan. Tatak Bisaya. Padayon!

View all posts by Rome Nicolas →

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.